Abhisambodhikramaḥ caturthaḥ
Technical Details
[4]
abhisambodhikramaḥ caturthaḥ
namaḥ śrīvajrasattvāya
vajrasattvaṃ namaskṛtya sarvaśūnyopadeśakam|
caturtho hyābhisambodhikramo'yaṃ vakṣyate mayā||1||
asau svayambhūrbhagavān eka evādhidaivataḥ|
upadeśapradānāt tu vajrācāryo'dhikastataḥ||2||
tatsamārādhanaṃ kṛtvā varṣaṃ māsamathāpi vā|
tasmai tuṣṭāya gurave pūjāṃ kuryāt tu śaktitaḥ||3||
yathāsvabhāvato mudrāṃ nivedyāsmai suśikṣitām|
gaṇamaṇḍalamadhye tu kuryāt pūjāṃ yathāvidhi||4||
tatastuṣṭo mahāyogī pañcakāmopabhogataḥ|
ālokasyodayaṃ kuryāt samāpattividhānataḥ||5||
kalaśādau susaṃsthāpya bodhicittaṃ prayatnataḥ|
ardharātre cābhisiñcet suśiṣyaṃ kṛpayā guruḥ||6||
abhiṣekaṃ tu samprāpya pratyūṣamaye punaḥ|
sampūjyārādhayet stotrairguruṃ śiṣyaṃ kṛtāñjaliḥ||7||
traidhātukavinirmukta ākāśasamatāṃ gataḥ|
nopariṣyasi kāmeṣu nirālamba namo'stu te||8||
aniḥśrito'si skandheṣu dhātuṣvāyataneṣu ca|
viparyāsavinirmukta nirālamba namo'stu te||9||
avikalpitasaṅkalpa apratiṣṭhitamānasa|
acintyamanasikāra nirālamba namo'stu te||10||
anālayaṃ yathākāśaṃ niṣprapañcaṃ nirañcanam|
ākāśasamacitto'si nirālamba namo'stu te||11||
draṣṭukāmo'bhisambodhiṃ sarvaśūnyasvabhāvikām|
stutvā kṛtāñjaliḥ śiṣyo guraṃ sañcodayet punaḥ||12||
prayaccha me mahānātha abhisambodhidarśanam|
karmajanmavinirmuktam ābhāsatrayavarjitam||13||
prayaccha me mahācārya vajrajñānamanuttaram|
sarvabuddhamahājñānaṃ sarvatāthāgatālayam||14||
prayaccha me mahāvajra kāyavākcittaśodhanam|
anādinidhanaṃ śāntaṃ sarvakleśaviśodhanam||15||
evamārādhito yogī sadbhūtaguṇakīrtanaiḥ|
śiṣye kāruṇyamutpādya kramamevamathārabhet||16||
āloko rātribhāgaḥ sphuṭaravikiraṇaḥ syād divālokabhāsaḥ|
sandhyālokopalabdhaḥ prakṛtibhirasakṛd yujyate svābhiretat|
no rātrirnāpi sandhyā na ca bhavati divā yaḥ prakṛtyā vimuktaḥ
sa syād bodhikṣaṇo'yaṃ varagurukathito yogināmeva gamyaḥ||17||
naiśaṃ dhvāntaṃ vinaṣṭaṃ vyapagatamakhilaṃ sāndhyatejastu yasmin
bhāsvānnodeti yāvat kṣaṇa iha vimale darśayed bhūtakoṭim|
śiṣyāyācāryamukhyo vinihatatimiro bāhyasambodhidṛṣṭyā
prāpnotyadhyātmasaukhyaṃ vyapagatakaluṣaṃ buddhabodhiṃ kṣaṇena||18||
anādibhūtaṃ tvathavādibhūtaṃ
amadhyabhūtaṃ tvatha madhyabhūtam|
anantabhūtaṃ tvathavāntabhūtaṃ
tat sarvaśūnyaṃ pravadanti santaḥ||19||
gamanāgamanaṃ ca yatra nāsti
kṣayavṛddhī na cāpyabhāvabhāvau|
ativismayarūpam arūpyavismayaṃ
sthitimannāpi na cāpi gatvaram||20||
yadasti-nāstivyavahāramuktaṃ
na puṇyarūpaṃ na ca pāparūpam|
na puṇyapāpātmakamagrabhūtaṃ
tat sarvaśūnyaṃ pravadanti buddhāḥ||21||
evaṃvidhaṃ tattvamavāpya yogī
carācarātmā jagadekabandhuḥ|
yaḥ paryaṭejjñānamayo nṛsiṃhaḥ
kṛtsnaṃ jagat so'vyayakāyalābhī||22||
sa jihyakāyo'pyavijihyakāyaḥ
so'nāsano'pyāsanabandhadhīraḥ|
samīlitākṣo'pi vibuddhanetraḥ
samāhitaḥ sanna samāhitau'sau||23||
sa vāgyuto vāgasamanvito'pi
bhogānvitaḥ so'pi virupavṛttiḥ|
sa lokanāthaḥ parabhṛtyabhūto
yastattvavit kṣīṇasamastadoṣaḥ||24||
prāptopadeśakaḥ śiṣyo dvidhā yogamathābhyaset|
piṇḍagrāhakrameṇaiva tathā caivānubhedataḥ||25||
śirasaḥ pādato cāpi yāvaddhṛdayamāgataḥ|
bhūtakoṭiṃ viśed yogī piṇḍagrāha iti smṛtaḥ||26||
sthāvaraṃ jaṅgamaṃ caiva pūrvaṃ kṛtvā prabhāsvaram|
paścāt kuryāt tathā''tmānam anubhedakramo hyayam||27||
śvāsavāto yathā''darśe layaṃ gacchati sarvataḥ|
bhūtakoṭiṃ tathā yogī praviśocca muhurmuhuḥ||28||
gacchaṃstiṣṭhan svapan bhuñjannunmiṣan nimiṣan hasan|
anena dhyānayogena sadā tiṣṭhati tattvavit||29||
sattvārtho'pi kadācit syāt tattatsārūpyaraśminā|
vāyuvijñānayuktena svādhiṣṭhānakrameṇa tu||30||
yathā nadījalāt svacchānmīnamuttiṣṭhate drutam|
sarvaśūnyāt tathā svacchānmāyājālamudīryate||31||
pañcabuddhakulāyattā mahāmudrādikalpanā|
pañcaraśmisamucchreyā gagane śakracāpavat||32||
mudrābandhaṃ prakuryād vā mantraṃ cāpi japed yadi|
sarvamanyat prakuryācca sarvaśūnyapade sthitaḥ||33||
sarvabhuk sarvapaścaiva sarvavandī ca sarvagaḥ|
sarvakṛt sarvaliṅgī ca sarvaśūnyena sidhyati||34||
prāptopadeśaḥ subhagaḥ suśiṣyo
baudhau hi cittaṃ paramārthanāma|
guroḥ sakāśāt punarādadīta
kṛtāñjalirdhāritapuṣpahastaḥ||35||
sarvabhāvavigataṃ skandhadhātvāyatanagrāhyagrāhakavarjitaṃ dharmanairātmyasamatayā svacittam ādyanutpannaṃ śūnyatāsvabhāvamiti|
tatastu gurave dadyād dakṣiṇāṃ tvanurūpataḥ|
ratnaṃ gṛhaṃ vā hastyaśvaṃ grāmaṃ vā śayanāsanam||36||
dāsaṃ dāsīṃ priyāṃ bhāryāṃ putrīṃ cāpyativarṇabhām|
ātmānaṃ cāpi yaddadyāt kimanyadavaśiṣyate||37||
prāptācāryaprasādo vimaladṛḍhamatiḥ sarvabhāvasvabhāvaḥ
svacchaṃ śuddhaṃ susūkṣmaṃ paramaśivamayaṃ buddhanirvāṇadhātum|
nirdvandvaṃ nirvikalpaṃ satatasukhamayaṃ bhāvayet tattvayogī
puṇyāpuṇyād vimuktaḥ svayamiha bhagavān jāyate vajrasattvaḥ||38||
|paramarahasyasukhābhisambodhikramaścaturthaḥ samāptaḥ||
kṛtiriyam ācāryanāgārjunapādānām| granthapramāṇamasya ślokāścatvāriṃśat|